माझा देश लढतो आहे

ना कोणी हिंदू

ना कोणी मुस्लिम

ना कुठला ख्रिस्ती झगडतो आहे

अस्मानासम संकटासोबत या 

माझा देश लढतो आहे....

बंद झाली देवळे सुद्धा 

अन झाल्यात बंद मशिदी चर्च

लढणाऱ्या प्रत्येक डॉक्टर पोलिसात

आज देव दिसतो आहे

धावा करून त्याच देवांचा यश मागतो आहे

माझा देश लढतो आहे....

ना मराठी ना गुजराती

ना तामिळ ना पंजाबी

एक होऊन भारतीय फक्त

अहोरात्र झुंजतो आहे

अकस्मात ओढवलेल्या या दुःखात

माझा देश लढतो आहे....

ना सत्ताधारी ना विरोधक पार्टीचा

ना कोणी ह्या न त्या विचारसरणीचा

माणुसकीच्या पक्षाचा तिरंगा 

आसमंतात फडकतो आहे

 उभ्या जगाला ऐक्याने लाजवत

माझा देश लढतो आहे....

संपले भाऊबंदकीचे हेवेदावे

आणि भरल्या साऱ्याच जखमा

तोंडही न बघणारे एकमेकांचे 

एकाच घरात नांदत आहेत

नजर न लागो कुणाचीच कधी 

असा बांधव घडतो आहे

माझा देश लढतो आहे....